വിദ്യാർഥി പ്രക്ഷോഭം: കോൺസ്റ്റിറ്റ്യൂഷൻ ക്ലബിൽ ചർച്ച; സിജെപിയുമായി കേന്ദ്രത്തിന്റെ സമവായനീക്കം

നീറ്റ് ചോദ്യപേപ്പർ ചോർച്ചയെ തുടർന്ന് കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവയ്ക്കണമെന്ന ആവശ്യം ഉന്നയിച്ച് സമരം നടത്തുന്ന കോക്രോച്ച് ജനതാ പാർട്ടി (സി.ജെ.പി) പ്രതിനിധികളുമായി കേന്ദ്രസർക്കാർ ചർച്ച നടത്തി. കോൺസ്റ്റിറ്റ്യൂഷൻ ക്ലബ് ഓഫ് ഇന്ത്യയിൽ നടന്ന ചർച്ചയിൽ കേന്ദ്രമന്ത്രിമാരായ ജെ.പി. നഡ്ഡയും ജിതേന്ദ്ര സിങ്ങും സർക്കാരിനെ പ്രതിനിധീകരിച്ചു. സി.ജെ.പിയെ പ്രതിനിധീകരിച്ച് സൗരവ് ദാസ്, അശുതോഷ് റാങ്ക, വൈഷ്ണവി ഗൗർ എന്നിവർ പങ്കെടുത്തു. ചർച്ചയിൽ സി.ജെ.പി മുന്നോട്ടുവെച്ച ആവശ്യങ്ങളിൽ രണ്ടെണ്ണത്തിൽ കേന്ദ്രം അനുകൂല നിലപാട് സ്വീകരിച്ചു. എന്നാൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ്റെ രാജി ആവശ്യത്തിൽ അന്തിമ തീരുമാനം നാളെ അറിയിക്കുമെന്ന് കേന്ദ്രം വ്യക്തമാക്കി. നഡ്ഡയുടെ വസതിയിലോ ഓഫീസിലോ ചർച്ച നടത്തണമെന്ന കേന്ദ്രത്തിന്റെ ആദ്യ നിർദേശം സി.ജെ.പി തള്ളിയിരുന്നു. നിഷ്പക്ഷമായ വേദിയിൽ മാത്രമേ ചർച്ചയിൽ പങ്കെടുക്കൂ എന്ന നിലപാടിൽ സി.ജെ.പി ഉറച്ചുനിന്നതോടെയാണ് കോൺസ്റ്റിറ്റ്യൂഷൻ ക്ലബിൽ യോഗം സംഘടിപ്പിച്ചത്. സമരത്തിന് പിന്തുണ പ്രഖ്യാപിച്ച് 26 ദിവസം നിരാഹാര സമരം നടത്തിയിരുന്ന സോനം വാങ്‌ചുക്, കേന്ദ്രമന്ത്രിമാരായ ജെ.പി. നഡ്ഡയും ജിതേന്ദ്ര സിങ്ങും ആശുപത്രിയിലെത്തി നടത്തിയ ചർച്ചയ്ക്ക് പിന്നാലെ നിരാഹാരം അവസാനിപ്പിച്ചു. എന്നാൽ സമരം തുടരുമെന്ന് സി.ജെ.പി അറിയിച്ചു. കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവയ്ക്കാതെ സമരം അവസാനിപ്പിക്കില്ലെന്ന നിലപാടിലാണ് സി.ജെ.പി. ചർച്ചയ്ക്കായി സർക്കാർ നിരവധി നിർദേശങ്ങൾ മുന്നോട്ടുവെച്ചിരുന്നെങ്കിലും വേദിയെച്ചൊല്ലിയ തർക്കമാണ് നേരത്തെ ചർച്ചകൾ വൈകാൻ കാരണം. അതേസമയം, നീറ്റ് ചോദ്യപേപ്പർ ചോർച്ചയ്‌ക്കെതിരെ ജന്തർ മന്തറിൽ സി.ജെ.പി സമരം തുടരുകയാണ്. രാജ്യവ്യാപകമായി സമാധാനപരമായ പ്രതിഷേധങ്ങൾ സംഘടിപ്പിക്കാനും സംഘടന ആഹ്വാനം ചെയ്തിട്ടുണ്ട്. ജൂലൈ 20ന് നടന്ന മുൻ ചർച്ചയിലും മന്ത്രിയുടെ രാജി ആവശ്യത്തിൽ കേന്ദ്രം അനുകൂല നിലപാട് സ്വീകരിച്ചിരുന്നില്ല.