അഭിജീത് ദീപ്കെയ്ക്ക് വിവാഹാലോചനകളുടെ പ്രവാഹം; എല്ലാം നിരസിച്ച് സി.ജെ.പി നേതാവ്, എന്തുകൊണ്ട്?..

വിവാഹാലോചനകൾ ഏറെയെത്തിയിട്ടും 'ഇപ്പോൾ വേണ്ട'; കാരണം വ്യക്തമാക്കി അഭിജീത് ദീപ്കെയുടെ അമ്മ

ഡൽഹി ജന്തർ മന്തറിലെ വിദ്യാർഥി സമരത്തിലൂടെ ദേശീയ ശ്രദ്ധ നേടിയ സി.ജെ.പി നേതാവ് അഭിജീത് ദീപ്കെയ്ക്ക് വിവാഹാലോചനകൾ തുടർച്ചയായി ലഭിക്കുന്നുണ്ടെങ്കിലും, അവയെല്ലാം അദ്ദേഹം നിരസിക്കുകയാണെന്ന് അമ്മ അനിത ദീപ്കെ പറഞ്ഞു.

കഴിഞ്ഞ രണ്ട് വർഷത്തിനിടെ നിരവധി വിവാഹാലോചനകൾ വന്നെങ്കിലും, സാമ്പത്തികമായി സ്വയംപര്യാപ്തനായ ശേഷം മാത്രമേ വിവാഹം കഴിക്കൂ എന്ന നിലപാടിലാണ് അഭിജീത്. സ്വന്തം വരുമാനത്തിൽ ഉറച്ച് നിൽക്കാതെ കുടുംബജീവിതം ആരംഭിക്കാൻ താൽപര്യമില്ലെന്നാണ് അദ്ദേഹത്തിന്റെ തീരുമാനം. വാർത്താ ഏജൻസിയായ പി.ടി.ഐയ്ക്ക് നൽകിയ അഭിമുഖത്തിലാണ് അമ്മ ഇക്കാര്യം വ്യക്തമാക്കിയത്.

30-കാരനായ അഭിജീത് പഠനം പൂർത്തിയാക്കി സ്വന്തം കാലിൽ നിൽക്കുമ്പോഴേ വിവാഹത്തെക്കുറിച്ച് ചിന്തിക്കൂവെന്നും, കുടുംബം പലതവണ സമ്മതിപ്പിക്കാൻ ശ്രമിച്ചെങ്കിലും സ്വന്തം സമ്പാദ്യത്തിൽ മാത്രമേ വിവാഹം നടത്തൂ എന്ന നിലപാടിൽ ഉറച്ചുനിൽക്കുകയായിരുന്നുവെന്നും അനിത ദീപ്കെ പറഞ്ഞു.

മകനെ കുടുംബജീവിതത്തിൽ കാണാൻ ആഗ്രഹമുണ്ടെങ്കിലും, ഇപ്പോൾ അദ്ദേഹത്തിന്റെ ആരോഗ്യത്തിനാണ് കൂടുതൽ പ്രാധാന്യം നൽകുന്നതെന്നും അമ്മ പറഞ്ഞു. അടുത്തിടെ ആരോഗ്യപ്രശ്നങ്ങൾ നേരിട്ടതിനാൽ വിശ്രമം അനിവാര്യമാണെന്നും, നാട്ടിലെത്തിയാലും ഒരു മാസത്തേക്ക് വിവാഹകാര്യങ്ങൾ പറഞ്ഞ് ബുദ്ധിമുട്ടിക്കില്ലെന്നും അവർ കൂട്ടിച്ചേർത്തു.

നീറ്റ് യു.ജി പരീക്ഷാ ക്രമക്കേടുകൾക്കെതിരായ ദേശീയ വിദ്യാർഥി സമരത്തിലൂടെയാണ് അഭിജീത് ദീപ്കെ രാജ്യവ്യാപകമായി ശ്രദ്ധ നേടിയത്. സമരത്തിന് ശേഷവും അദ്ദേഹത്തിന്റെ വ്യക്തിജീവിതവും തീരുമാനങ്ങളും സമൂഹമാധ്യമങ്ങളിൽ ചർച്ചയാകുകയാണ്.